PUTRI SOLO

Mlaku ngubengi Baluwerti
Kampung Tamtaman ndudut ati
Wewayangan Rong Puluh tahun kawuri
Sekar melati arum gondho dinulu
Ing ngisor wit sawo kecik kene
Lungguh dhingklik ngadep taman
Ono janji sing ora kawetu

Gegodhongan tiba kumleyang
Gumletak ing ratan
Aku isih kober nyruput wedang kopi
Nalika kowe ninggal esem
Terus lumaku
Ngaras atiku sing kasmaran

Saiki kowe ana ngendi...?
Sumribiting angin lan rontoking gegodhongan
Ing sak ngisoring wit sawo kecik kene
Isih ono tilas wewayang esemu
Nggugah rasa kangenku

(dedek witranto - geguritan)

COKEKAN SOLO

Kemriyek bocah-bocah cilik
Dolanan gegojegan dalan kampung
Pinggir kali Sangkrah riyele cethul kemliwer
Warga kontrak omah
Ngalor ngidul jeduk dalan sing pada
Wis ilang kampung bawera
Wis prasasat ora ana gang-gang sing ombo
Aja nggoleki bocah dolanan gobak sodor
Swara jangkrik wae ora keprungu

Siter ngganter
Suarane : cing ngecang cing ngecang cing...
Oraq nyamleng
Amarga kasilep gumrunggunge motor
Kendang ciblon
Suarane : Tak kethung plak det thong thung tak ndhet dhang..
Ora gregetake pancak gulu
Amarga wis pada cengeng nyawang kahanan
Ndedel pengarep, ndeder penyakit bludrek

Wis ngger....
Katimbang dolanan jamuran kurang cacah
Dolana nyang Grand Mall mampira tuku bolah
Munggah nyang parkiran ngulukna layangan
Bakal gede angine ora panas hawane
Yen uwis...
Ngilera nyawang es semangkok Pitung Ewu

Dalan tengah kutha ruwet ribet kesrimpeting wanci
Slamet Riyadi panggah ngadek jejeg ngecungake pistul
Nyawang mangulon pernahe Merapi Merbabu
Umpamane bisa celathu :
" Kesel aku njaga Solo ngecungake pistul
Lha gek anak buahku pada mblayang nyang ndi ?
Rak yo butuh leren wedangan sik to aku...?"

Cokekan saya ngganter
Lagune Caping Gunung
Lha koq Solo saya bingung


(dedek witranto - geguritan)

SERABI SOLO

Nangkring dhingklik madep ngidul
Anglo cilik wajan cilik Jladrenan mawa santen rinacik
Arum pandan gandane
Cinakot empuk gurih rasane

Sawangen pinggir ing dalan gede
Sisih kidul ril sepur ora tangi tangi
Ngenteni wanci kukuting mangsa katiga
Jare sepur kluthuk bakal pamer budhaya
Genepi pepaking pariwisata
Etungane reregan panguripan

Kayu bakar sing nyurung lakune
Sepur kluthuk entek pirang kwintal...
Ngorot boros ora patia guna
Paedahe mung wawasan bingung
Nyumpeki Solo

Bakul serabi jinejer sauruting dalan pasar pon
Lumaku alon kridhaning upaya upa
Sepur kluthuk lumaku alon kapeksa
Kaya semar kelangan kuncung
Bingung lemes nglokro pangrasa
Yen to bisa celathu : " Aku arep jajan serabi sik thole..."


(dedek witranto - geguritan)

WEDANGAN SOLO

Teh com tahu bakar
Sega kucing wedange jahe
Pedhot panyawang
Rasa kumleyang
Sapa sing kelangan
Lelakon kaya dijangkar
Wektu kang terus kumlawe

Kopi susu kue kumbu
Nyandak timus ati muwus
Etungen... saben saka sing nuak pendhapa
Rak ya mung papat sing dadi guru
Saka guru, guru saka
Papat keblat tuladha jimat
Adeg lan gedene kudu pada
Pindha laku lan kareb, pikir lan rasa
Yen cengkah bakal blengkrah satemah bubrah

Klasa pandan ginelar
Lungguh lesehan guyub jejagongan
Kumritiking areng dadi mawa
Ndayani jiwa saya geter
Gayeng ngonceki kahanan

Wengi lumaku alon nastiti
Gelas lepek panganan bakaran
Dadi seksi Solo ngenteni wanci

(dedek witranto - geguritan)

LANGGAM SOLO

Dalanan wengis miyak kaendahan
Gapura keris katon mringis nggegirisi
Pasar tingkat salah mangsa
Ngebaki dalan nyumpeki taman bawera
Topeng topeng gede
Prasasat ngece ungele gangsa

Lagu langgam kumandang mampang
Regenging bebrayan among mitra
Gumelar ing loji jejingkrakan
Polah ngetut iramaning tlutur
Kanggo apa nyentelake pitutur

Banyu kali wis ora mili
Kaya wong mati nggoleki mori
Wedangan pating tlecek
Geneya.. para pujangga sastra
Katrem ngeyub ngisor pendhapa
Lelangen ngumbar gagasan
Kelangan greget ukaraning mardi

Gumebyaring gladak sinorot lampu
Kaya kenya lara branta kasmaran donya
Geneya.. para sarjana beksa
Katrem sila ana pawiyatan
Ngutak-utek tanjak ulap-ulap srisig ginelung
Keplintir dadunge ngoyak jangkah stratane

Langgam kang gumleyang
Solo dadi nggrangsang kemaruk kaendahan
Njlimeti nglacak sumunaring gincu
Geneya.. malah pada rayahan jatah ruwatan
Pamer gagasan jor-joran gebyar

Wengi saya cubriya
Langgam nalongso terus ngumandang
Solo sangsaya kaniaya
... Yen ing tawang ana lintang...

(dedek witranto - geguritan)

puisi puisi yang berserakan

LAGU ANGIN

Dingin dalam musim ini
Menjelma nyanyian nestapa
Menggema menyapa pekat rimba
Bangunkan satwa berselimut kabut

Kemana lari kijang
Dalam cekatan loncat perdu
Kemana aum singa
Dalam kekuatan jaga
Tergilas rebah pohon
Termangsa deru buas gergaji

Rintih duka
Senyapkan rimba
Tenggelam dalam nestapa
Sunyi terasing lena merana
Begitulah angin
Selalu dendangkan lagu

(dedek witranto - hutan tak bertuan)